فوات الأوان
فكرة( فوات الأوان) ..خطرت على بال حد قبل كده ؟ حد فكر قد ايه بيروح مننا فرص؟ قدايه بيضيع من بين ايدينا اشخاص؟ قد ايه بيفوتنا أماكن و لحظات وذكريات كانوا ممكن يكونوا من اجمل ما حصل لنا؟
يمكن أنا كمان مفكرتش بتمعن في الفكرة دي قبل كده,قبل دلوقتي لما فقدت كذا حاجة وكذا شخص وحسيت فعلا بمعنى الكلمتين دول..حسيت بندم على ناس مكنتش قريبة منهم قبل دلوقتي و حاليا خلاص اصبحوا بعيد,حسيت بندم على كل قرار اخدته تجاه شخص معين و اجلت تنفيذه و الشخص ده دلوقتي مش مجود معانا في الدنيا اصلا,حسيت بندم تجاه كل مرة نطت في دماغي فكرة ومدتهاش حقها في تخطيط و تنفيذ,حسيت بندم تجاه كل كلمة كنت عايزه اقولها في موقف معين وحاليا خلاص مش هيكونلها طعم.
المشكلة في عدم أخذ الخطوة. لأسباب غريبة كتير بنقف..مش بنرضى نطلع خطوة كمان قدام,النية موجوده وتمام بس..لاء مش دلوقتي. السؤال هو : ليه مش دلوقتي؟ طب امته؟
مر عليا العام ده كذا موقف كنت اقدر اخد فيهم الخطوة اللي نويت عليها تجاه كذا شخصية اعرفها ومعملتش ده,اخرت الكلمة و اخرت الفعل. حاليا مبقاش في مجال لقول الكلمة او تحقيق الفعل..خلاص الفرصه راحت,الأوان فات. ولما باجي أفكر هو انا ليه مقولتش للبنت دي يلا نخرج؟ هو انا ليه مقولتش لبابا شكرا على اليوم الفولاني كان جميل جدا؟ هو انا ليه مرحتش زرت شخص ما وقت تعبه ويمكن مهتمتش كمان غير لما الوضع اصبح خطير؟ و الإجابة غالبا بتكون هي إني اتلهيت في حاجات تانيه مش بنفس قيمة الحاجه
اللي كنت ناويه اعملها..
الحياة تغيرات,لازم هيدخل حياتنا اشخاص وأماكن و بعد فترة يطلعوا و يدخل غيرهم قول كلمة ما او عمل فعل معين مش هو اللي هيثبتهم في حياتنا وغير ذلك هيضيعوا مننا!
الفكرة وما فيها إن منضيعش فرصة خلق ذكرى حلوة من ايدينا. بلاش نبخل بإدخال فرحة على نفس حد,والأهم بلاش نأجل حاجه هنندم و نتأثر إحنا بعدمها..أحيانا بنكون محتاجين نقول و نعمل حاجات معينة عشان نكون راضيين عن نفسنا ايا كانت النتيجة.
يايريت ميكنش الناس موجوده و تمشي و يجي غيرهم و يمشوا واحنا مبناخدش أي خطوة! اطلعوا خطوة قدام.
تتلخص معاناة الناس في الحياة بأمرين; توقع المستقبل و الندم على الماضي
-أوليفر غولدسميث-
كلما تقدمت بالعمر وجدت أن ما تندم عليه هو ما لم تفعله
-زخاري سكوت-
النية موجودة لكـن العزم رقيق، والعزم يتطلّب حزم، والحزم يتطلّب تضحية. لا أحد يُحب التضحية، نحنُ نحبُ الكسب بدون تضحية. كلام لطيف.
ReplyDelete